...:::انا والبطيخ وهواك:::..., مع سيكرت منير 100.6fm 12

انا و البطيخ وهوااك .. برنامج .. للحب.. و عن الحب

مع سيكرت منير


الحب
ذلك الشعور السهلبيسي الذي يزعزغ عقول البشر
و يهشك قلوبهم


مستمعينا لسه بنتكلم عن الحب وحلقتنا النهارده عن

الاستهبال في الحب
معاكم سيكرت منير علي نجوم fm مزيكا علي كيف كيفك

في.. انا و البطيخ و هواك

من دلوقتي ولمدة ساعتين
مستنين تليفوناتكم علي 6066
او علي 8555022
او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها



دايما بتمر بينا اوقات بنحس فيها اننا مش قادرين نعيش من غير الحب و من غير الحبيب
و الشعور دا متولد و منبثق من الاحساس التواجدي الكوني في اللامركزيه العصبيه للقلب
و دايما بتقابلنا مواقف كلها استهبال في الحب
ياترى احنا بنعمل ايه و رد فعلنا بيكون ايه لما نقابل حد بيستهبل في الحب ..
وخصوصا اننا جيل موبايلات و انتوا عارفين ان انا عندي 16 سنة فحاسس بيكم و حاسس بمشاكل الجيل كلها ...



اولا الرصيد اللي بيخلص في يوم و انت لسه شاحن كارت ب 100 و تفضل تحرق في دقايق علي حبيبتك و في الاخر لما الرصيد يقرب يخلص تقولها بحبك بحبك امموووه
تقولك انت بتستهبل يا حبيبي اتلم لساورس يشوفنا



او حبيبتك اللي تفضل تكنسل عليك تكنسل عليك عشان استخسرت فيها كوزين درا علي الكورنيش
و انت اصلا مفلس مش لاقي تاكل و لما تيجي تصالحها علي الموبايل تلاقيها بتكنسل ..
فتضطر تصالحها بكارت ب 5 و تستهبل .. تلاقيها بتصرخ في وشك و تقول
انت بتستهبل؟؟
اقل من 200 متورنيش وشك



و حبيبك اللي ييجي في اوقات يعمل فيها عالم فلك و يقولك انا بقرا الكف
و يفضل يفعص في كف ايدك ولا كأنه شاف ايدين قبل كدا
و في الاخر تقوليله
انت بتستهبل ؟؟ حد يشوفنا
و انتوا اساسا قاعدين في الشارع
مستمعينا الاستهبال في الحب حالة بتمر بكل المهاطيل و المهابيل من ابناء الجيل و لو مستخدمناش عقلنا في الاستهبال بيقلب عباطه
وممكن مغص كلوي


مستمعينا مستني تليفوناتكم علي 6066
او علي 8555022
او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها ياما زحلقها



نستقبل اول اتصال تليفوني و نقول الوو

الوو


الووو


الووووو

واضح ان الخط قطع

- الوو ايوا يا سيكرت

اهلا نتعرف بيكي ..

- بثمه

اهلا بيكي يا بسمه ياريت تعلي صوتك شويه

- معلش يا سيكرت اثل انا بتكلم من تحت البطنية ..

مفهوم طبعا عشان محدش يقفشك و انت بتتكلمي
بثمة بنتكلم النهارده عن الاستهبال في الحب .. تقدري تقوليلي يعني ايه الاستهبال في الحب و بيمثل لك ايه

- بص يا سيكرت اولا انا بموت موت موت جدا طحن في البرنامج بتاعك و والله مش بفوت ولا حلقة منه ابدا خالث
و ثلملي علي الشقي الحكروت موت موت حتومه و قوله انه لذيذ اووووي و بنحبه مووت موووت ..


هو بيضحك وفاتح بقه اهوه و بيقولك
مرسي ليكي يا بسمه


- يا سيكرت انا بكلمك عشان الحلقة بتاعتك النهارده مخثوث عشاني
انا كنت بحب واحد و انا في 2 ابتدائي و فضلنا نحب بعض للجامعة


جميل


- اهـء اهـء اهـء


لا اهدي يا بسمه و قوليلي ايه اللي حصل

- يا سيكرت اخد كل حاجة كل حاجة

اححمم
حتى الموبايل


- يا سيكرت بقولك كل حاجة
اهـء هـء هـء

طيب اهدي يا بسمه
بصي يا بسمه
الحب شعور متبادل بين اتنين
مينفعش طرف واحد من غير الطرف الاخر و لازم الاتنين يكونوا متفاهمين و متعاونين
هو دا الحب اللي هايدوم طول العمر و بكدا نحل كل المشاكل اللي تقابلنا حتى مشكلة غسيل الالوان مع الابيض .. لان تايد
برغوته الجديدة حل المشكله
مستمعينا نسينا نقول ان تايد من رعاة البرنامج
مع تاااااايد في الغسيل مفيش مستحييل
بشكرك يا بسمه علي اتصالك و بهديلك اغنية السوبر ستار عمرو دياب ....


يا قاعدة علي الترعه و بتغسلي المواعين
جاتك ستين وكسه دا شرفك بقا في الطين




نص ساعة اعلانات ..




انا و البطيخ و هواك برنامج للحب و عن الحب
مع سيكرت منير



الحب
لحظات من الامل متولدة في وسط غابات الغضب البشري الجارف المتعارض مع احداث الحياة
فالحياة بدون حب
كالشجرة بدون موبايل ..

مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 6066 او علي 8555022
او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..



الوقت بيمر معاكم بسرعة و حاتم بيضحك مش عارف علي ايه بس تقريبا عشان البت اللي بتبيع ترمس علي كوبري ابو العلا حولت له 5 جنية رصيد ..

هاه ؟؟ عشره رصيد

طيب اشطه يا حتوم .. اخوك بقا هاه


نستقبل اتصال تليفوني و نقول الووو

الووو

الووو


الوووووو

الظاهر الخط قطع

الوو ايوا يا سيكرت

اهلا نتعرف بيكي
ياريت تعلي صوتك لان الصوت بعيد اوي

_معلش اصل انا بكلمك من الحمام
انا سمر من المنوفية

اهلا بيكي يا سمر


سمر بتكلم النهادرة عن الاستهبال في الحب
انت ايه رأيك في الاتستهبال عامة و خصوصا في الحب

سيكرت انا عاوزه اقولك في الاول انت انت احلى و اجمل اعلامي و صوت شفته في حياتي و انا بسجل كل الحلقات بتاعتك و بحبك اوووي يا سيكرت

ربنا يخليكي يا سحر ..

انا كنت بحب واحد نجار مسلح و بعدين كنت في يوم ماشية في الشارع لابسه باضي جميل و ديق موووت و بعدين واحد عاكسني فحبيبي شلحف

مين ياسمر ؟؟

_شلحف هو اسمه شادي بس انا بدلعه شلحف
قام ضارب الواد اللي عاكسني بالعتله الحديد شاقق له دماغه
هو دلوقتي في السجن
و انا بحبه اوي يا سيكرت و مش عارفه اعمل ايه
و اهلي بيضغطوا عليا مووووت مووووت عشان اتجوز واحد قد ابويا
سيكرت انا مش عارفه اعمل ايه

بصي يا سحر

_سمر

اه سوري
بصي يا سمر
بنقابل ناس في حياتنا بنحبهم و بيحبونا و ديما كتير بنكون شبهمم و زيهم .. حتى الحب نفسه سعات بيحب انه يتكون على حبيب و حبيبه
و حبيبك بيحبك و ان شاء الله يطلع بالسلامة
بس تعرفي هو لو كان العتله الحديد مصنوعه من حديد عز اكبر مصنع في الشرق الاوسط و المصدر الرسمي لحديد الجدار العازل كان حبيبك زمانه مشنوق دلوقتي لان حديد عز يتميز بالصلابه و القهوه و السيخ مظبوط و بالتمام ..

شكرا يا ساره على اتصالك و بهديلك اغنية السوبر ستار محمد فؤاد


يا مسجون في لومان طره
نفسي اكل معاك كوز دره




مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 6066 او علي 8555022
او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..



نص ساعة اعلانات



مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 6066 او علي 8555022
او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..

اس ام اس كتيرررر جدا النهاردة




هااي سيكرت بحبك مووت... وبحب صوتك .. صوتك بيريحنى ولا احسن علبة دوا اسهال .. بجد وهدؤك بالكلام انا بحبه اوى موووت انا اتعرفت على واحد من ع النت وقابلته بس نفسى احسسه بمشاعرى اعمل ايه ارجو الرد يااحلى اعلامى واعذب صوت فى الكون..
__________________

هاى يا سيكرت ازيك يا جميل
البرنامج جميل جدا وانتة كمان مواضيعك تحفة .. وعايزاك تقول لجابر انى بحبه جدا وميزعلش منى ابدا.. رغم كل اللي بيعمله و رغم انه قليل الادب و دايما بيعمل حاجات سوفاج بس بحبه
اصل انا منحرفه و بحب الانحراف ..
بحبك يا تامر
قصدي يا جابر
حبيبتك شاهيناز

__________________

هاى سيكرت انا محمود من الاردن عاوزك تقول لهبة اننا مش هانفترق تاني ابدا ابداا
حتى لو فضلت تقرقض في ضوافر رجليها ببقها ..
__________________

هااي يا سيكرت ازيك
يا سيكرت عاوز الايميل بتاعك بجد في مواضيع مهمه قوي عندي عاوز الحل ليها .. معلش يا سيكرت بليز و الله يا سيكرت انا تعبانه موووت و انت الامل الوحيد ليا ..

__________________

هااي سيكرت يا احلي و اجمل صوت في الدنيا
سيكرت بليز ممكن حلقه عن الحب من طرف واحد اصل اخوك كهربائي سيارات ...
بحبك مووووت يا سوكا

__________________

هااي يا سيكرت انت اجمل و احلي صوت في الكون كله
ارجوك يا سيكرت قول لحسن انه مهما دور على حد ممكن يحبه ويسامحه ويغفر له كل حاجه مش هيلاقى غيرى لانى بحبه بصدق ومش عاوزة منه اى حاجه
خالص.. و هتنازل عن تمن الموبايل اللي ضربوا مني في الشهر اللي فات و باعه و جاب بيه كله عشان يشمها ..

__________________

سيكرت
ازيك يا جميل
على فكره يا عم انت شوفلك حل .. حبيبتى بتحبك
انا محمدين من دمياط .. بحبك قوى يا رضوى__________________

هاااي يا سيكرت ازيك عامل ايه
انا عارفه ان الحب مفهوش كرامه وهو الى خلانى بقيت كدة ازاى بعد كل دة هو اللى يبعد ويختار هو علمنى ازاى معرفش اعيش من غيرة ونسى يعلمنى لما يبعد هعيش ازاى ... بحبك يا بعجررر
__________________

هاااى سيكرت انا فى عندى مشكله انا بحب واحده ومش عارف اصرحها خايف يكون الحب من طرف واحد
بحبك يا سندس ااوووي و نفسي اخد الرصيد اللي في موبايلك كله ..

__________________

هاااي سيكرت ازيك
انا سنية من القاهرة
انا بحب واحد قد ابويا و مش عارفه اعمل ايه بحبه موووت مووووت يا سيكرت عشان شعره الابيض الجميل و فجأة اكتشفت انه سمكري سيارات و ان البويه جت علي شعره
سيكرت انا مش عارفه اعمل ايه انت املي الوحيد
__________________

هاااي سيكرت ازيك
انا عيوشه من شبرا و بحب واحد من الصعيد
و اتخانقنا بس لما سمع الحلقة بتاعت البرنامج اللي فاتت جاني تحت البلكونه من الصعيد مشي و قعد يعيط و انا بحبه خالص يا سيكرت
بحبك يا صميده موووت موت







الوقت بيمر معاكم بسرعة وقت حلقتنا انتهى و حاتم فرحان مش عارف ليه
باين البنت بتاعت الدره حولت له رصيد تاني
كان معاكم سيكرت منير علي نجوم اف ام مزيكا علي كيف كيفك
في انا و البطيخ و هواك من 12 لـ 2
بشكر كل اللي كلمنا و اللي بتعت ا س ام اس
مع انا و البطيخ و هواك استنوتا يوم الحد في نفس الميعاد قبل ساعتين من دلوقتي علي نجوم اف ام 100.6
مزيكا علي كيف كيفك

برعاية



ان تاتش
و ماكدونالدز
و مؤمن
و اريال و تايد
خديجه جمال مبارك
سوزان
و كنتاكي
و مصنع كوبايات ام سمير
و كراسة الاول
سلاح التلميذ
سوق الخضار في السبتيه
مصنع كريمات ام وائل
كوافير ام ابراهيم للسيدات و قسم خاص للمحجبات
مزرعة دواجن او احمد لتسمين العجول
النادي الاهلي و الزمالك
اديداس و بوما و نيكي و لوتو و امبروو
اميجو كوتشي بينور
امريكانا الجودة
لانشون حلواني الإخوان
منظمة التحرير الفلسطينية
مجلس الشعب
سمنة الهانم


اتمنى يكون البرنامج ده عاجبكم واتمنى اكون قدرت ارسم بسمة على شفا كل الي هيقرى الموضوع
سواء رد او مردش